بعد بكرة

فجأة تلاقى عمرك بيخلص
تتعب 

تبص عالوقت اللى فات

تشوف مين لساه مكمل
مين اللى فارقك 

ومين اللى مات

تحسب سنين الوقت اللى عدَّى
وتفتكر ساعتها كل الحاجات
اللى كان نفسك ف يوم تحققها
بس راحت من سكات

وغيرها مكنتش عامل حسابها
والباقى صفحة فى ذكريات

فتتنهد وتسكت شوية
وتسأل تدور على إجابات
ل "ليه" و"امتى" و"مش بس لو"
وناسى إن بكرة بعده آت

                                                             -سلمى عبدالوهاب-

قصة ومن غير تشكيل

القصة أساسا مكتوبة
وانت عليك بس التشكيل

يا تسيب الضمة تعيش فترة
وتتوه وياها فى التفاصيل

يا تشيلها وتحط الفتحة
وتخليها تقول بضمير
إن الماضى ده عدى وفات
وماعادش فى منه غير أساطير

ولا ال "أنا" تتحول "إحنا"
والموضوع قابل للتغيير

والغايب يبقى الحاضر
والمفعول يصبح فاعل
والنايب قدامه كتير

فماتستغربش أما القصة
تيجى تاخد منك وقت طويل

                                                                         -سلمى عبدالوهاب-

عن 3

عن كل الكلام 
اللى كان نفسك تقوله
وما قلتوش


عن كل حلم حلمته عالى
واما جيت فى يوم تطوله
ما مسكتوش

عن كل حد عدَّى فى حياتك
وحاولت تمحيه من ذكرياتك
وما نسيتهوش

عن كل قولة بحبك أجلتها
عشان بس الحد ده
ما تخسروش

عن صورة رسمت فيها نفسك
واما جيت ف يوم تشوفها
طلعت مش أكتر من رتوش

                             

                                                     -سلمى عبدالوهاب-

عن 2

عن القصة
اللى كان نفسك فى يوم تكمل
وما كملتش

والرواية اللى شلتها ع الرف
وما خلصتش

عن الأحلام
وكل حاجة اتمنيتها
وما حصلتش

عن الناس اللى باعوا
والدنيا كملت مشى عادى
وما وقفتش

عن الحاجات اللى باظت
والحاجات اللى ضاعت

عن كل مرة زعلت فيها
وقلت الفرحة وحشانى
عن كل مرة قلت فيها يا رب
الدنيا ليه معاندانى

وجه بعديها حاجات احسن
أتارى اللى فات كان اصلاً
مجرد بداية للحدوتة
وقصتك شوية شخبطة فى النوتة
أحداثها لسة بتترسم
وماتكتبتش.

                                                          -سلمى عبدالوهاب-

عن 1

عن كل حاجات بتقول عديتها
واتاريك لسة ما عديتهاش


وبتقنع نفسك ب نسيتها
واتاريها جواك فيلم بيتعاش


بتشوفه أول ما بتصحى
ويمر كده قصاد عينك وكإنه فلاش


وتقلب فيه ب يا ريت أو لو
فيجيلك صوت ويقول ما بلاش


اهو ماضى وعدَّى ومسيره يتعدَّى
فتضحك فجأة أصلى ما بنساش

                                                                   -سلمى عبدالوهاب-

عادى

اللى صار بينى وبينك
مش مجرد حيطة سد

ده حلم كان أصلا كبير
وف لحظة ابتدا يتهد

ماكانتش كدبة وعديناها
وساعتها أنا قلت عادى
والكدبة بتجر كدبة
وبعدها الاقيك قصادى

تسألنى بس مالك 
أرد ماتحطش فى بالك
فتقولى معلش لأ بجد ؟
ف اقولك خليك فى حالك
أصله بقى الأمر عادى

هيفيد بإيه اللى أقوله
واللى قلته من الساعادى

ماعادش يجيب همه الكلام

ولا انا مستنى رد
ف يللا على الله السلام

كانت أيام وراحت

وانت بقيتلى شخص عادى
زيك زى أى حد !

                                                                           -سلمى عبدالوهاب-