عن إنك تكون بنت !

يعنى من يوم ما تتولد والأم لازم تسمع الجمل دى  من أى حد " إيه ده انتى جبتى بنت؟ معلش يا حبيبتى اللى تجيب البنت بكرة تجيب الولد, بكرة تخاويها وتجيبى لجوزك الولد اللى يشيل اسمه, معلش يا حبيبتى بكرة ربنا يرزقك بالولد ".

معلش ؟ ليه كل المعلش اللى بتتقال دى ؟ لحد امتى هنفضل عايشين فى مجتمع شايف إن خلفة البنات بتجيب العار, بذمتكو فرقنا إيه عن أيام الجاهلية ؟ هقولكو أنا فرقنا إيه, على الأقل أيام الجاهلية كانوا بيوئدوا البنات ويريحوهم, لكن دلوقتى كل اللى بيحصل إنهم بيفكروا إزاى يعذبوهم.

ننتقل بقى من مرحلة المواليد إلى مرحلة الطفولة, عشان تلاقى كل الهدايا اللى بتيجى لأى بنت عبارة عن عرايس, حتى يصبح عقلها الباطن لا يفكر فى أى شئ غير إنها تبقى عروسة ومن عروسة لأم بتعتنى بأطفالها وهكذا, وكأن حياة البنت تتلخص فى الكلمتين دول " الجواز والأمومة " بغض النظر بقى عن أى حاجة تانية, موهوبة مش موهوبة, كل ده مش مهم.

وتفضل البنت تكبر وكل ما تكبر كل ما الأسئلة الحشرية بتزيد مع السن, فتلاقى بقى الأم بتتسئل أسئلة من نوع " هى بنتك بلغت ولا لسة, لو بلغت تبدأ تسمع فى نصايح متنزليهاش ما توديهاش ماتخليهاش, ولو لسة ما بلغتش يبقى هتسمع كلام إيه ده ازاى لأ لازم توديها لدكتور يشوفها ليكون فيها حاجة, وإلخ . . . 

السؤال هنا بقى " وانتو مالكو بكل ده ؟ ", ليه دايما الناس حاطة عنيها على مراحل نمو البنت بالشكل ده, يا ترى عشان خايفين عليها ولا خايفين منها ؟ 

نيجى بقى لمرحلة دخول الجامعة والالتحاق بالكلية, وكالعادة لما يعرفوا إن البنت هتدخل طب ولا هندسة متسمعش منهم غير " ليه كده ؟ ما كنتو تدخلوها كلية 4 سنين واقلب ما مسيرها تتجوز وتقعد فى البيت ".

تانى تتجوز ؟ هو إيه البنت مينفعش تعمل فى حياتها حاجة تانية ؟ لازم تتجوز عشان تحس إنها ناجحة فى حياتها وإلا فهى فاشلة بغض النظر عن تفوقها فى الدراسة ووصولها لدرجات عالية من العلم, لكن كل ده يتم تهميشه قصاد إنها تكون لسة ماتجوزتش.

ويبقى السؤال الملح طوال سنين الدراسة " ها يا حبيبتى مفيش حاجة كده ولا كده, مش هنسمع خبر حلو قريب, يعنى السنارة لسة مغمزتش ", ولإن الزن عالودان أمر من السحر, بتلاقى عدد كبير جدا من البنات أصبح شغلهم الشاغل هو البحث عن عريس الغفلة, ولما تبدأ تلاقى البنت من دول أصحابها بيتخطبوا واحد ورا التانية تبدأ تفقد ثقتها فى نفسها إنها كده خلاص مش هتتجوز, مع إنها لسة فى أوائل العشرين من عمرها, يعنى لسة قدامها العمر طويل بس هنقول إيه بقى.

البنت تتخرج من هنا, والكل يستنى إنه يسمع خبر خطوبتها من هنا, وكإن العريس مستنى على باب الكلية, مش مهم بقى هى اتخرجت بتقدير إيه وهتشتغل إيه, كل ده مش مهم, شغل إيه وكلام فاضى إيه, اقعدى فى البيت اتعلميلك أى حاجة, تطبخى وتنضفى وتخيطى لحد ما يجيلك عدلك. طب وكيانك ؟ كيان الست إيه غير بيتها وجوزها, وسواء اشتغلتى أو ماشتغلتيش يبقى السؤال هو " اتخطبتى ولا لسة ؟ "

لو لسة ماتخطبتش " معلش اصبرى بكرة يجيلك رزقك ما تستعجليش, بغض النظر عن إنهم هم اللى بيبقوا مسروعين, ولو اتأخرت عن ال 25 يللا يا حبيبتى شدى حيلك بدل ما تعنسى, ولما تعدى ال 30 خلاص كده هى حصلت رسمى على لقب " عانس ", بس هى ناجحة جدا فى شغلها وعملت وسوت, مش مهم, ولا يكتفى المجتمع بذلك اللقب فقط, بل إنه يستبيح لنفسه أن يخوض فى عرضها ويبرر عدم زواجها بأشياء كثيرة لا تمت للواقع بصلة.

ولو اتخطبت يبقوا مستنيين هتتجوز امتى, ولو فسخت يبقى هى فيها حاجة أمال إيه اللى خلاه يسيبها, طب وليه مايكونش هو اللى فيه حاجة وليه مايكونش الاتنين كويسين بس محصلش نصيب.

وبعد الجواز, حامل ولا لسة, لو اتأخرتى يبقى العيب فيكى, ولو مبتخلفيش يبقى جوزك من حقه يتجوز عليكى عشان حرام عليكى تحرميه من إنه يكون أب وطظ انتى فيكى مش مهم تكونى أم, ولو حامل هتولدى امتى, وبعد ما تجيبى الطفل الأول يبقى هتخاويه امتى.

دايما فى امتى, دايما فى خطوة تالية لكل خطوة بتعمليها, الناس واقفالك عالواحدة بجدول مواعيد , والشاطرة اللى تخلص الأول, دايما فى " ماذا بعد ", تحسى الناس دايما مستنية منك حاجة ولو ماتعملتش تبقى فشلتى فى حياتك أيا كان اللى عملتيه وفى الآخر اللوم دايما بيقع عليكى, لو حد عاكسك ولا اتحرش بيكى أصل انتى الغلطانة, أصل انتى اللى كنتى لابسة مش عارف إيه فأثرتى غريزته ولو مش لابسة المش عارف إيه يبقى انتى بردو اللى غلطانة أصل إيه اللى منزلك فى الشارع وفى الوقت ده. ومن برة لجوة لما الست تشتكى من جوزها تبقى هى اللى غلطانة عشان أكيد هى اللى معكننة عليه عيشته, ولو طلبت الطلاق يبقى معندناش بنات تتطلق عشان كلام الناس, وعشان انتى الست ولازم تستحملى, لكن لو هو اللى عاوز يطلق يبقى حقه يعنى يعيش مع واحدة مش عايزها, ولو مات جوزها لازم تكمل حياتها من غير راجل تخليدا لذكراه يا إما هتكون ما صدقت جوزها يموت عشان تتجوز وبكده هى خانت العشرة, أما الراجل فلازم يتجوز لما مراته تموت أمال مين اللى هياخد باله منه ومن عياله, معلش أصل الراجل معذور.

وبعد ده كله تلاقى فى ناس بتقول ما الستات واخدين كل حقوقهم القانونية ودمتم على كده, طب فين حقنا على المجتمع, المجتمع الذى لم يرحمنا منذ لحظة ولادتنا إلى يومنا هذا لا من نظراته ولا من كلماته ولا من عقليته الرجعية المتخلفة, لحد امتى هنفضل عايشين فى مجتمع يخلى كل بنت تكره إنها تكون بنت, وبيقتل جواها أى إحساس بالانوثة, ويخلينى أقول فى بالى يا ريتهم يوئدونى بدل ما هم قاعدين بيعذبونى.

                                                                                            -سلمى عبدالوهاب-