جدع يا باشا

منساش أبدا أيام الثورة و اللجان الشعبية اللى كانت سهرانة طول الليل بتحمى بيوتنا و شوارعنا لما كانت عربية الجيش تعدى كانت الناس تهلل و تصقف بعلو صوتها تحية و إجلالا ليهم و للجند اللى نازل علشان يحمينا من البلطجية .

و تمر الأيام و بالرغم من توالى الاحداث اللى كل شوية تلعب دورها فى انها تهز من ثقتنا فى هذا الكيان إلا إننا كان لسة عندنا فيه و لو ذرة امل لم نفقدها بعد , آه صحيح الناس نزلت يوم الجمعة 18 نوفمبر تأكيدا على حقهم فى ثورتهم حتى لا يتم التلاعب بها مطولا كما بدا من نوايا لا نعلم يقينا حقيقتها و لكنها كانت بمثابة جمعة الضمان ليس اكثر ببساطة عشان ماتضيعش , و هناك من نزل إلى الميدان بحثا عن حقه الذى لم ياخذه جراء ما أصابه أيام الثورة فما كان منهم سوى الاعتصام لحين تنفيذ مطالبهم التى هى أبسط حقوقهم (مع العلم أن هذا الاعتصام كان قد بدأ قبلها بايام و لكن لم يعتد به حينها) .
نمنا جميعا لنصحو فى اليوم التالى على خبر فض الاعتصام بطريقة وحشية من ظباط الأمن المركزى متحججين بأنهم كانوا يهجمون على وزارة الداخلية و ان ما فعلوه ليس إلا دفاعا عن المكان و النفس , لا والله ؟ .

لحد هنا بقى و لازم نقف شوية كده قبل ما حد يقول " ما هم اللى جابوه لنفسهم و انتو كنتو عايزينهم يعملو ايه يعنى ؟ ماحنا لو سبناهم يهجموا على المكان -ده لو كانوا فعلا بيهجموا عليه يعنى- هتقولوا هو فين الامن و لو ما سبناهمش هتقولوا ازاى بتتعاملوا معاهم كده "

انا معاك يا سيدى اللى يغلط يتعاقب اللى يهجم يتحاسب اضربه فى رجليه عشان تشل حركته و تقبض عليه , لكن اللى حصل ان ضباط الداخلية استسهلوا و جابوا من الآخر رصاصة فى الدماغ ولا فى الصدر و لا فى القلب انت و نشانك المهم تبقى جدع يا باشا .

جدع يا باشا لما تضيع حياة واحد و تيتم عياله و ترمل مراته , ولا تقهر امه و تحرق قلب ابوه , ده لو حرامى و ابن كلب ما تعملش فيه كده , لو فعلا هدفك حماية بلادك من مثيرى الشغب ما تبقاش انت مثير للشعب.

لما تنزل تفض اعتصام 200 واحد و تخرج ب 676 مصاب و 4 قتلى تبقى مش جدع يا باشا , لما الناس تحس انها مخدوعة فى اللى ماسكينها و تنزل عشان تحمى اللى مش باقى منها تبقى مش جدع و لا عمرك سمعت عن الجدعنة و المرجلة اللى بجد -يا باشا-.

اللى تروح عنيه ايام يناير و ينزل تانى مش هاممه اى حاجة غير بلاده و تروح فداها عينه التانية و تشوف على وشه ابتسامة امل و رضا طالما هو على حق و عايز الحق يبقى وقتها تعرف مين الجدع .

لما الناس دى تنزل تلم حالها و محتالها و فى ثوانى من غير ما تفكر تكون فى الميدان تقف لجان و تنادى بعلو صوتها تهتف نبضها فى عروقها يرجف , و اللى مش قادر بيجمع فلوس اكل اسعافات امدادات يحاول يوصلهم باى طريقة بس توصل .

لما الموتوسيكلات تبقى اسعاف للمصابين , و الدكاترة عاملين مستشفى مش هاممهم أى مين , و البنات اللى مش عارفة تنزل عشان اهلها مش موافقين بس من حمقتها و غيرتها نزلت و اللى يحصل يحصل بقى مش مهم بس المهم تشارك فى الحدث .
كل دول نازلين من غير أجندة هدفهم واحد مهما كان التمن مش عايزين غير بلادهم تبقى بتاعتهم . 

و بعد كل ده تطلع تقول عليهم بلطجية و مدسوسين ؟؟ بذمتك ده فى شرع مين و انهى ملة و انهى دين ؟

نيجى بقى لخطاب المشير مع مراعاة فروق التوقيت المحلى لمدينة المجلس العسكرى اللى مسمعناش منه غير متأسفين و ان تم قبول استقالة الحكومة و هنعمل استفتاء نكمل ولا نمشى طبعا مع التأكيد مرارا و تكرارا على عجلة الانتاج اللى واقف حالها و انها لازم تمشى ان شالله حتى بالزق بس تمشى و الله الموفق و المستعان .

و كالعادة اتقسمنا بين مؤيد و معارض و مش فاهم ايه المغزى من الخطاب , المهم انه اكدلنا انهم ما ضربوش رصاصة واحدة على صدور المتظاهرين , عشان دى مش اخلاقهم .

بعيدا عن الخطاب و اعتراضى عليه بس اللى مفهمتوش و متهيألى غيرى كتير ما فهموهوش ليه الضرب كان مستمر بعد الخطاب , ليه حمام الدم زاد , و إذ فجاة الناس يترمى عليها قنابل غاز غير مرأى بيأثر على اعصابهم و حركتهم , كده ؟ من غير أى مبرر و لا سبب ولا معنى للى حصل و اما تسأل تكتشف ان لا المشير مسئول و لا اللواء منصور العيسوى مسئول , أمال دى مسئولية مين و مين اللى فى ايديه الصلاحيات انه يعمل كده ؟ و يعمل كده ليه أصلا و عشان مين و لصالح مين ؟ 

حسيت فى لحظة اننا بقينا فى نص المعركة كل اللى فيها ملثمين و محدش عارف مين ضد مين و مين مع مين ؟؟ عارف لما تتفرج على فيلم بيحكى عن حروب المسلمين أيام الردة تلاقى كله بيضرب فى كله فتسأل "مين الكفار؟" , ده اللى حسيته وقتها مش عارفة ليه .

الوضع كله أصبح مهزلة . مهزلة ؟ آه طبعا مهزلة لما اللى المفروض يحميك عالحدود مش عارف يحميك جوة الميدان و انت نفسك ما تبقاش عارف هو ايه اللى بيحصل و ليه , لما يكون عدوك ابن بلدك يبقى كده مات بيننا الكلام .

و بعدين شيوخ الازهر تنزل تعمل هدنة -بغض النظر عن ما آلت اليه الامور و بقينا بنقول هدنة و خط النار- و على غفلة و الناس بتصلى يرجع الامن يضرب فيهم تانى بعزم ما فيهم يبقى لازم نسال و نحط جمب السؤال مليون علامة استفهام عشان مين كل ده ؟ عشان خايف ماللى فوقك و نسيت اللى قدرته فاقت كل اللى فوقك ؟

عرفت بقى مين فينا الجدع و مين فينا الجبان ؟ و لا تحب نقول كمان ؟